في وسط زحمة السوشيال ميديا بشكل عام و الإنستجرام بشكل خاص من انفلوينسرز بيروجوا لمنتجات و مودلز و إعلانات الشركات وسط ما بتلف في دوامة المقارنات مبين حياتك و حياة الناس اللي منزلة صورتها في الساحل،بيظهر بعض المحتوى الإيجابي اللي أصبح عرضة للإنقراض في الفترة الأخيرة بتقدمه الإستثنائية شرين عرفة.
مين هي شرين عرفة؟ "مبحبش السؤال دا, بحس زي لما كانوا بيسألوك و أنت صغير عايز تطلع ايه لما تكبر و تبقى مجبر إنك تعرف نفسك بكلمة واحدة، و دا غلط، أنا صانعة محتوي أنا بردو زوجة و أم، أنا فيمينست، أنا بمثل في الفيديوهات اللي بعملها، أنا درست في كذا مجال، مينفعش أختار واحدة منهم و أقول أنا دا."
حتى وجودها على السوشيال ميديا ما كانش الأساس "أنا خريجة إعلام وكنت أتمنى تساعدوني أسافر بره اكتشف قدراتي الفنيه اكثر ولكن ما حصلش وبعد الجواز ولما خلفت اتجهت انى اتعلم عن التربية وتعمقت في المجال لدرجة فترة من الفترات كنت بفكر أفتح الحضانة بتاعتي ولكن بعدما دخل ابني الحضانة حسيت بوقت فراغ كبير كان دائمًا في فكرة في دماغي إني أعمل محتوى على السوشيال ميديا ساعة ما كنت حرفية ماشية ماسكة الموبايل ولاقيت كل أنواع المنصات على السوشيال ميديا مبتقدمش أي حاجه مبتكرة ومجرد برامج عاديه جدًا زي اللي كنا بنشوفها في الراديو زمان، تافهه وسطحية. فأنا قررت إني أحاول أقدم محتوى ممتع والناس تستفيد به في نفس الوقت لأني كنت مؤمنة أن السوشيال ميديا شيء خطير جدًا لو أستعمل غلط. وفي وسط مستنقع الإنستجرام الابتر وجدت أساليب حياه فخمة وسطحية جدًا وغير واقعية يكون لها تاثير سلبى كبير جدًا لكل اللي بيسمعها لدرجة أن بعض الناس ممكن يجي لها اكتئاب شديد أو حتى تنتحر بسبب كدا وطبعًا بأتكلم عن الفيمينزم وأن حتى لو أنكر كده ناس كثير فإن حقوق المرأة في مجتمعنا المصري متاكلة. "
واحد من أشهر أنواع المحتوى اللي بتقدمه شرين في الفترة الأخيرة هو شرقية بالشركسية. " في زمن الكورونا كل الناس كانت بتحاول تلاقي حاجة تملى بيها وقت فراغها. أنا فكرت أن أحنا كنا محتاجين الوقت دا وقت راحه من اللي بيحصل حوالينا، وقت أننا نقرأ، نقعد مع عائلتنا و هكذا. فيالوقت دا أنا كنت عايزة أجرب أعمل حاجة على zoom و كان فيه مواضيع و مشاكل اجتماعية كتير مسكوت عنها، فجتلي فكرة أننا نعمل نقاشات من النوع دا و نشاركها مع الناس."
و عن دور السوشيال ميديا في الكلام عن المشاكل ديه "معتقدش أن فيه محتوى ثابت بيكلم عن مشاكل من النوع دا بطريقة عملية ممكن الناس تفهمها زي ما ممكن أنت و صاحبك مثلًا تتكلموا مع بعض فيها. كله بيتكلم بطريقة علمية بحتة مش قريب منها مجتمعنا بشكل عام."
عن موضوع التحرش اللي كان مشهور في الفترة الاخيرة علي السوشيال ميديا و عن دور السوشيال ميديا في الموضوع " طبعا لازم دايما نتكلم عن مواضيع زي ديه و نشجع البنات اللي مرت بحاجة زي كدا إنها تتكلم، و لكن اللي بيحصل كتير هو العكس و ناس تقول دا عيب أو حرام و دا مش هينفع، لازم نعترف بالمشاكل اللي عندنا و نشوف طرق اننا نحلها و لازم السوشيال ميديا تساعد في موضوع زي دا. ولكن برضو المدارس تلعب دورو ازاي تعد الناس للحياة اللي هتقابلها، لو أحنا قدرنا نعد عن طريق التعليم و الإعلام إذا كان تيليفزيون أو سوشيال ميديا جيل من الشباب السوي المثقف معظم مشاكلنا هتنتهي من تلقاء نفسها أن ماكانش كلها. "
و عن الشخصيات المشهورة في السوشيال ميديا و كلمة انفلونسر بالذات " أنا شايفة أن كل واحد بيتابع اللي شبهه، مثلًا معظم البنات محجبة فهتلاقي المحجبات عندهم فولورز كتير، ممكن يتابعوا ناس عشان حسهم الفكاهي،لكن الناس اللي اسمهم الحالي انفلونسر اللي بيروج لمنتج أو أسلوب حياة معين و عايز يوري الناس نسخة سطحية جدًا عن قد ايه حياته حلوة و مفيهاش مشاكل و دا شيء مش واقعي و مبتخليش اللي يتابعه يرضى عننفسه و بتضايق،, طب ليه تتابعوا من الاساس ؟"
و شاركت أكتر الكتب و الناس اللي بتشوفهم إلهام "من أكتر الشخصيات اللي بحبها علي السوشيال ميديا و بشكل عام هما will smith
opera whinfrey, ellen, Jennifer aniston.kevin hart Jamila jamil,
أما الكتب ممكن the monk who sold his Ferrari, 21 days و a new earth , magic , tipping point the artist way,
مشاريع للمستقبل " أنا من مدة كان نفسي أعمل شركة بتضم مجموعة كبيرة من صانعي المحتوى من كل الأنواع و نقدم كل أنواع المحتوى من فيديوهات و عروض و خطابات نروج لفكرة تنمية النفس و نحاول يكون لينا تأثير إيجابي بشكل كبير عشان بشوف المحتوى دا قليل جدًا في مصر و نحاول نجمع ما بين المتعة و الإستفادة بأكبر قدر ممكن."
نصيحة للجيل الجديد؟ " أشتغل على نفسك كتير و حاول تهتم بصحتك النفسية و الجسدية، أقرأ كتير، أسمع بود كاستس، حاول تبعد الناس السلبية من حياتك إذا كان من صحابك أو ناس بتتابعهم على السوشيال ميديا و حاول متبقاش هدفك كله في الحياة مادي و شوية ارقام فولورز علىالسوشيال ميديا و حاول يكون ليك هدف خاص بيك و النجاح هيجي لحد عندك، و أهم حاجة ماتخفاش من الفشل، الفشل شيء طبيعي و منطقي و ما هو إلا خظوة لحد ما توصل للي أنت عايزة، بشوف ناس كتير مش شايفة أنها كويسة او أنها ملهاش هدف في الحياة و طب ازاي ؟ هل أنت مقتنع فعلًا أن ربنا خلق كل شيء على الأرض ديه بكل تفصيلة فيها و خلقك من غير هدف؟ كل واحد له هدف و شخصية لازم كل واحد يكتشفها بنفسه وأعرف نفسك بنفسك سيبك من كلام عيلتك أو صحابك أو أي حد. الخلاصة أعرف نفسك، أعرف هدفك و أقرأ أكتر أتعلم أكتر عشان تعرف هتوصل لهدفك ازاي و اسعى له و ما تزهقش و هتلاقي الدنيا ماشية معاك و بتديك اللي تستحقه. "
Interviewer: Bahaa Hossam
Editor: Eman Ibrahim
Graphics: Ola Sherif
Comments